Tissawwar leġġenda minn mal-ġenb

Għamel logħba sħiħa tiela’ u nieżel. Bhas-soltu, ħaffer trinka jew aħjar kanal fuq ix-xellug. Iżda llum mhux is-soltu. Illum qieghed Pariġi. Ġo finali. Għal dik it-tazza b’żaqqha kbira u widnejha kbar. Lil hinn mill-parrokjaliżmu tar-Renju Unit. Kontra tim aristokratiku li jilbes kollox abjad. Illum l-akbar logħba Ewropeja tas-sena.

Bl-istess kunjom kellu kollega. Is-similitarijiet jieqfu hemm iżda. Bl-istess kunjom kien hemm President tal-Amerka darba wkoll. Izda qatluh. U wara d-debutt, disa' snin wara d-delitt tant kien ħażin li l-kowċ qallu li sparaw lilu u mhux lilek x'aktarx bi żball. Sofistikat ma tantx kien. Il-partitarji laqqmuh u qabluh ma’ persunagg ta’ zmien il-ħagar. Sħabu l-hena tagħhom jiġbdulu saqajh. Meta jkun riħ isfel, il-pass jew twil iż-żejjed jew qasir iż-żejjed. Imma dejjem sabuh hemm. Bħal-pitrolju fix-xitwa għal ġol-heater. Jnittinlek dar imma fl-aħħar mill-aħħar jsaħħanielek. U l-but ma jtaqqabhulekx. Il-parti tieghu dejjem jagħmilha.

Disa’ minuti mit-tmiem sab ruħu ‘l fuq. Ircieva ballun minn throw-in. Ħabbtu ma’ sidru u niżżlu quddiemu. U issa kien fil-kaxxa l-kbira. L-anglu kien kemmxejn magħluq. X’jaghmel? Għalaq għajnejh u fajjar b’kemm kellu saħħa b’saqajh ix-xellugija. U l-ballun għadda minn bejn il-goaler u l-lasta u x-xibka biss waqfitu. Skurja. L-aktar goal importanti f’hajtu. Għaddej mill-isbaħ mument f’ħajtu. Fetaħ idu berah u l-adrenalina mexxietu quddiem il-partitarji tiegħu li żebgħu il-Parc des Princes ahmar. Sħabu daru miegħu jgħannquh.

Ismu naqqxu darba għal dejjem fil-folklor u l-istorja tal-klabb glorjuż tiegħu. It-tifel mistħi tal-klassi rebaħ l-ewwel premju. L-għada kien fuq quddiem nett tal-karozza tal-linja miftuħa. Flimkien mal-imgħallem tiegħu għolla it-tazza fit-toroq moħnuqa tal-belt adottiva tiegħu. Belt li l-logħba tal-ballun hija part minn ħajjithom. Belt li bħalissa qiegħda taqla' fuq wiċċha. U l-ballun qiegħed jnessi u jdewwi xi ftit id-daqqiet ta' ħarta. U hu tahom mediċina ħelwa.

Minn wara l-kwinti, ggradwa għall-attur principali, jew aħjar benjamin.